Cebuano News: Presidente Aquino mihatag pagtugot alang sa negosasyon sa increased rotational presence pinaagi sa framework agreement

Ni Susil D. Ragas

SURIGAO CITY, Agosto 13 (PIA) – Mihatag na sa iyang pagtugot si Presidente Aquino aron sugdan na sa Pilipinas karong semanaha ang negosasyon tali ngadto sa Estados Unidos aron mugnaon ang polisiya sa dugang rotational presence pinaagi sa framework agreement, matud sa Palasyo kagahapon.

Si Presidential Spokesperson Edwin Lacierda mibutyag sa pagkamugna sa usa ka panel nga gilangkoban sa mga representante gikan sa Department of Justice, Department of National Defense ug Department of Foreign Affairs aron maoy mohawid sa komunikasyon alang sa dugang presensya sa pwersa sa Amerika dinhi sa nasod.

Sumala ni Lacierda dili manghilabot ang Presidente kalabot na sa maong negosasyon ug gitahasan niini si Foreign Affairs Assistant Secretary Carlos Sorreta isip maoy tigpamaba sa panel sa Pilipinas.

Sumala pa ni Lacierda nga ang pagmugna og maong framework agreement tali sa Estados Unidos aron maseguro ang dugang pwersa sa tropa sa Amerikano nahisubay ug sulod kini sa Konstitusyon ug mga balaod sa Pilipinas.

Dugang pa ni Lacierda nga ang maong rotational presence dili lamang makapauswag sa atong depensa apan makatabang usab kini ngadto sa atong humanitarian ug disaster response.(SDR/PIA-Surigao del Norte)