Cebuano news: Pundo alang sa pagpauswag sa kapabilidad sa PNP napagawas na sa Gobyerno

Ni Ni Susil D. Ragas

SURIGAO CITY, Agosto 12 (PIA) -- Napagawas na sa Department of Budget and Management ang pundo mokantidad sa P2.86 bilyon ngadto sa Philippine National Police (PNP) alang sa pagpauswag sa kapabilidad niini, matud sa Malakanyang niadtong Sabado.

Sumala ni Deputy presidential spokesperson Abigail Valte ang maong pundo nga gipagawas sa DBM gitagana alang sa Philippine National Police Operational Transformation Plan sa DILG.

Lakip sa mga pundohan mao ang pagpalit og 1,000 ka mga patrol jeeps, 13,597 ka assault rifles ug 4,997 ka mga mobile videos, mokantidad P344 milyon nga alang sa pagpa-ayo ug pagpa-pintura sa 810 ka mga police stations lakip na niini ang pagpalit og M4 magazines ug kits alang sa PNP Maneuver Units.

Sumala pa ni Valte ang DBM migahin usab og mokantidad P655 milyon alang sa pagmugna og bag-ong mga posisyon ug pagpangdawat sa mokabat 7,439 non-uniformed personnel nga idestino sa mga regional offices sa PNP, kining bag-ong mga personnel maoy mohimo sa administratibong mga trabaho sa PNP.

Uban sa administratibong mga trabaho sa bag-ong mga personnel, makatabang usab kini sila makatabang sa pagproteksyon sa katawhan. (PIA-Surigao del Norte)