Cebuano news: Sec. Roxas gitahasan ni Presidente Aquino aron ipatuman ang relokasyon sa mga informal settlers

SURIGAO CITY, Agosto 6 (PIA) -- Gimandoan ni Presidente Benigno S. Aquino III si DILG Sec. Manuel Roxas nga ipatuman gilayon ang relokasyon sa pamilya sa mga iskwater nga nagpuyo sa delikadong mga lugar ngadto sa mas desente ug dili delikadong lugar, matud sa opisyales sa Palasyo kagahapon.

Sumala ni Presidential Spokesperson Edwin Lacierda si Presidente mipagawas sa maong direktiba ubos sa birtud sa Memorandum Order No. 57 pinirmahan ni Executive Secretary Paquito N. Ochoa Jr. niadtong Agosto 2 karong tuiga.

Ubos sa R. A No. 7279 o ang Urban Development Housing of 1992 (UDHA), ang local government units (LGUs) uban ang koordinasyon sa National Housing Authority (NHA) maoy mopatuman sa relokasyon ug pagpabalhin sa mga tawo nga nagpuyo sa delikadong mga lugar sama sa esteros, dapit sa mga riles sa tren, dumpinganan sa mga basura, mga suba, kilid sa dagat, kana lug uban pa nga pangpubliko nga mga lugar.

Aron nga mapatuman gyud kining maong direktiba, ang DILG kinahanglan adunay koordinasyon sa LGUs, sa Presidential Commission for the Urban Poor, NHA, ug uban pang mga hintungdang ahensya sa gobyerno.(AMC/FEA/PIA-Surigao del Norte)